Glødande kjærleik

 

I timen det mørknar på glitrande blåne

skin strålar av sola i eldfulle glør

So lyser det minner i veksande måne

som tankar kring livet som hjarta mitt blør

Du kjelde av visdom og ungdommens styrke

av truskap og brorskap i brennande blod

Du glødar i kjærleik eg kjærkome dyrke

når livsdagen tagnar so strøymer di ro

Frå elskoven mektig veks arven til elden

den sloknar ei aldri om dag går mot natt

No blunkar det kjærleik i svermande kvelden

du lystige flamme min kjærkomne skatt

Tekst og foto 
G.Skaar

I all æve

No skodar eg syner so tindrande flott

som kveldsola stille meg sender

Mot havet ligg draumar av skinande slott

dei gløder mot heimlege strender

Eg kjenner på lukke frå himmel og nut

dei varmar og lindrar meg nære

No minnest eg gleda eg hadde som gut

då eldhugar levde so kjære

Sjå solbrune jenter med lystige smil

i hildring dei svingar og dansar

Til songar av kjærleik frå tusande mil

eg visseleg høyrer og sansar

Dei mjukaste former renn tankane fri

vi smeltar til eitt her i kvelden

Og natta mi lyser den næraste sti 

eg ottast ei pinsler og elden

Ja hit vil eg koma når livsdagen renn

når jordiske sansar tek ende

Sjå himmelske salar som strålar og brenn

i takksemd til åra han sende

Tekst og foto

G.Skaar

Besta og lyset

 

Eg minnast ei glede i andakt og sang

med salmar som lydde frå stova

Eit orgel med trøer av særeigen klang

som tona når eg skulle sova

Og båten var liten og havet var stort

vår Jesus han sytte for alle

Ho besta var lyset av venaste sort

eg endå kan høyre ho kalle

Min Gustav Min Gustav pass frelsa di no

for kjeltringar lurer kring nòva

Les boka syng salmar mot helvetes flo`

du freden i livet blir lòva

Ho besta var trufast til døyande dag

men fråfall tok handa åt guten

Ho evige frelse nok fekk av eit slag

der eg søkjer framleis i gruten

Ja tider skal kome og tider skal gå

og ungar lèt humlene suse

Om boka er vegen veit aldri dei små

som leikar av glede i huset

Tekst G.Skaar
Foto Jens Boge 

Minne om jul

 

Kveldsola dansar i raudlète smil

på prektige øyar og dalar

Og heilage stjerner frå tusande mil

ser jorda frå himmelske salar

Stille sit kallen og ser frå sitt glas

at mørket sig sakte rundt nòva

Med minnene mange frå høgtid og stas

og kona som stelte i stova

Einsam i skuggen av knitrande eld

han skjenkjer seg kaffi frå kanna

Og trufast i handa han Bibelen held

den himmelske mektige manna

Han myser mot sola som kvervar i hav

den livgjevne glitrande sæla

Og tenkjer på livet som kravde og gav

han dagane mødesamt træla

Ja, livet er minne og åra vert natt

ei stråle av sola tek ende

Den gråstenkte kallen ber livet sin skatt

som dagar av lyset han tende

Tekst og foto

G.Skaar

Til tapre små

 

 I mørket er sanning at alle er grå

Ja ingen ser skilnad på mennesker då

Til grava og molda har alle billett
so kalla di glede om livet er slett

No lyser det heimar i glede og sorg

Ei kvinne sit fengsla med huset som borg

Men dagar skal skine som djupaste takk

til den som har flykta frå grava sin makk

Ja kjærleiken sviv som ein stor karusell

I tårer og sorger når andre har hell

Men reisa til lyset kan finne seg to

som alle treng mørket og kvila i ro

Du elskar av lyset og natta so god

som strålar i glede og brusar av blod

Vi tankane sender til alle i kveld

som kjempar mot kulde og brennande eld

Tekst og foto

G.Skaar

Snøblomen

 

Du vakraste ven

mitt blendande land

Heldig var eg som fekk deg

Fald ut ditt hår

di kjærlege hand

Nærleik du gir på min veg

Tekst og foto
 G.Skaar

Flammande lyster

 

 Det raudnar i kvelding ved glitrande randa

av tunger frå sola skin sjela av glød

I flammar stig krefter frå utstrekte handa

i eldhug og elskhug mitt daglege brød

Du kjelde av visdom og ungdommens styrke

i truskap og brorskap av brennande blod

Du glødar i kjærleik eg kjærkome dyrke

når livsdagen tagnar so strøymer di ro

I elskoven mektig stig arven til livet

han aldri ei brånar om dag går mot natt

Du blunkar so kjærleg eg elskar å klive

min flammande kjærleik og lystige skatt

Tekst og foto 
G.Skaar

Siste tur

 

Den vesle kròkne kona

lèt stille døra att

der kalde vindar susar

 og lyset svinn mot natt

Ho fàrne dagar minnest
 frå gamle tiders dom

og gløtter bort på bilder

i kalde tomme rom
 

Det flakkar lys or glasa
 ho faldar hender små

Og takkar lyse dagar
 då borna drog her frå

Ho skodar fjella kvite
 dei vinkar helsing pur

 Til endes går no reisa
 dit skrukne gamle bur

Eit liv ho ber til endes
eit sinn finn evig ro
Som sol av morgon lyser
åt borna like god

Tekst og foto 
G.Skaar

Brorskap

 

Det kveldar i fjellet min tanke er fri

Eit vindpust meg kjælar på kjaken

Eg skodar ei glede på hav og i li

Og nærleiken blottar meg naken

Åleine eg hentar ein styrke frå deg

Eit brorskap av utstrekte hender

I kjærleik du lyser av draumar til meg

Ei spegling du visseleg sender

Frå fjella eg helsar ei snor til mitt liv

I skodde og møye meg leier

Når kulden og ropet frå mørket meg riv

Eg høyrer du godorda seier

Tekst og foto 

G.Skaar

Tenn meg eit lys

 

Blant stjerner og åsar sit eg her i kveld

takksam og glad over kjærleikens eld

Fridomen skin over landet eg bur

lukkeleg fri for eit kvart diktatur

I randa spring kvinner med småbarn på arm

dirrande redsla strøymer i barm

Bombene flammar på himmelen raud

ungar og gamle blodige daud

Stundom eg tenkjer på livet du mor

kvifor skin lyset so gudlaust på jord

Når kvinner og søner av brennande blod

spring svoltne og redde når andre har flod

Ja, livet er urett so gi meg eit svar

kvelden min fostrar ein krigsherja far

Tenn meg eit lys for min kjæraste skatt

so liten og audmjuk eg tenkjer i natt

Tekst og foto 

G.Skaar

Call of the wild

 The call of the wild 

keeps ringing my ears

Like tunes on my mobile 

in darkness

Say duty my son 

will linger your soul

When silence hits hard

in the morning

Tekst og foto

G.Skaar

Leve våren

 Eg løfter mitt blikk mot den strålande dagen

den brenn som eit under for alle

Eg ligg her i graset i grønkande hagen

og sola ho steikjer min skalle

Eg ser ut i draumen av spirande flora

som vinkar i vårbrisar linne

I bjørka på tunet so skvaldrar no skjora

ho kattane tergar til sinne

Det beinflyg ei fluge med kvinande låtar

som buldrar i vårvàre øyre

På fjorden so dunkar det nylakka båtar

den vakraste vårlyd du høyre

Frå fjella eg lyer ei klukkande læte

av bekkar som leikande fløymer

Og gylla ho luktar ei stinkande væte

so grasstråa grøderikt strøymer

Det brækar av sauer med sprengfylde spener
so lamma med halane tirrar
Og sonen i huset med nyfrelste gener
han lettkledde jentene pirrar

Trompeten til frua eg brått lyer sanse
eit vitne om lysteleg hjarte 

Det ulmar i tanken ein bankande transe

av vårdagar rike og bjarte

No yrer det glede i livslyse stunder

so vårgraset kitlar min mage

For solkjære fuglar eit lukkeleg under
som sorgfrie dagar kan lage

Tekst og foto 
G.Skaar

Luft av kjærleik

 Eg skal hoppe ut i vona

klemme lukka av ein vår

Og som konge skal eg krona

mine modne nye år

Eg skal strekkje mine hender

opp til lyset blått i sky

Og so springe mine strender

lett og ledig utan bry

Glad av lukke skal eg snuse

eim av blomar ved mi strand

Og so kjenne fossen bruse

vilt i kjærasten si hand

Kvar ein morgon skal eg vakna

ut av anden frå ami

Og ei aldri skal eg sakna

luft av kjærleik på min sti

Tekst og foto 
G.Skaar

Livet som fant

 Huset mitt bles seg på skakke

det bles gjennom vegger og tak

Men eg kan Vår Herre han takke

for sikta er slett inga sak

Åleine eg sit her i hòla

Fann lukka i ringaste ly

Lèt andre i byen få skråla
Eg nynnar mi glede i sky

Når sola går ned ut i havet

til skrattande ryper og trall

 Eg smiler av jordiske kavet

i riket til himmelens hall

I dagning meg solstrålar gyller
dei skattar mitt auge so gildt

So livlege tonar meg fyller

av flammande dagar so snilt

Ja livet som fant er ei lukke

i randa eg visdomen fekk
Om regnet frå taket mon klukke
 og vegger er aldri so lekk

Kan hende ei jente hit vankar
so vakker ein dag framom meg
Og kjærleik på døra mi bankar
i gleda av nygådde steg

Tekst og foto 
G.Skaar

Dronninga

 

Du lystig deg svingar i vinterens prakt

og held meg i handa i tangoens takt

Mi bjartaste hulder i famnen min varm

du frosten kan tine med brennande barm

Du kneisar som dronning so trufast i tid

fær aldri med vondskap men smiler so blid

Du stoltast meg sender eit attrå i brann

so skin for meg kjære eg audmjuke mann

Tekst og foto

G.Skaar