Djevelens utsende


Det beit meg ei fluge på nasa mi raud
ho svei som av hinmannens rike
Eg slo etter beistet og ropte mi naud
men fram dukka hundrevis like

Eg fekta og banna og hitna i sinn
so fekk eg ei fluge i gapet
Ho kravla og spann kring om drøvelen min
so vitet eg trudde sku` tape

Men brått vart det alvor då insektet hogg
der nede i brokja og styret
Det kjendest som vesenet spytta og togg
og kveldsmaten sikra det dyret

Eg sprong som ein tykje til vatn eg fann
og hoppa i tjønna den myrke
Eg plaska og gaula det beste eg vann
og trygla om himmelens styrke

Nei svarten eg seier at fluger er beist
i helvetes eldar må brenne
Eg drøymer at fluger åt fanden har reist
so freden eg atter kan kjenne

Tekst og foto 
G.Skaar

Kvinner og vin


Draumane lokkar på havet det blå
mot guten frå landet det kalde og grå
No dansar det jenter i solstrålen varm
 med brunfarga kroppar og struttande barm

Ja tankane lokkar til varmare land
til vaiande palmar og brennande sand
Når jentene dansar i havbrisen linn
so kokar ein skalle det heitast du finn

Ein trave i skodde er sørgjeleg syn
no plaskar det væte med torden og lyn 
Og kaldslege vindar so neglene sprett
mot rennande nase og hovudet tett

Nei, no vil eg fara til varmare stròk
eg sluttar med slitet og sel no min kåk
Eg sola skal nyte og kveldane fin`
sjå hildring i havet med kvinner og vin

Tekst og foto 
G.Skaar

I graset


Eg løfter mitt blikk mot den strålande dagen
den brenn som eit under for alle
Eg ligg her i graset i grønkande hagen
og sola ho steikjer min skalle

Eg ser ut i draumen av spirande flora
som vinkar i vårbrisar lune
I bjørka so skvaldrar den heimlege skjora
ho tergar på katten på tune`

Det beinflyg ei fluge med kvinande låtar
som bulder i vårvàre øyre
På fjorden det dunkar frå nylakka båtar
dei vakraste låtar eg høyre

Frå fjella eg lyer ei klukkande læte
av bekkar som leikande fløyme`
Det stinkar frå bøen av nysprøyta væte
der grasstråa grøderikt strøyme`

No brækar det sauer med fyldige spener
so halar på smålamma tirrar
Og sonen i huset med nyfødde gener
han lettkledde jentene pirrar

Trompeten til frua eg brått lyer sanse
eit vitne om lysteleg hjarte 
Det ulmar i tanken som bankande transe
av solskin og dagane bjarte

 Ja gleda i livet er våren si kjelde
eg kilar meg ømt over mage
For solkjære fuglar kan gløyme si elde
og gryande kjødeleg plage


Tekst og foto 
G.Skaar

Ei lise


Ho leikande tirra min bakerste gane 
Ho sukra mi tunge av leskande drykk 
Ho glitra i lyset som vakraste svane 
Ho fingrane freista i dansande rykk 

Ei fargerik drue kan tirre ditt indre 
Kan måle din dag som eit eventyr stort 
Ho giftige tankar frå vanvitet lindre 
Ei lise for livet av venaste sort 

Tekst og foto 
G.Skaar


Lukka av vår


No helsar vi Dalsfjorden levande glad
han vinkar i morgonen fager
Og bygdene jublar av nysprotne blad
i fridom frå vinterens plager

Kjenn angen frå fjæra av solvarma tang
og bøane smiler til møte
Og tjelden han knepper sin gladaste sang
no yrer det liv ut av røte

Eg skodar ei jente frå fjelltoppen min
ei blendande godlynte frille
Ho svever av lyster i vårbrisen linn
frå fjella til fjorden den stille

Det blussar i minnet ein lystige trall
av rytmer frå ungdomens sødme
Og latteren trillar i himmelens hall
til morgonens eldande rødme

Eg vandrar det grøne og doggfriske gras
som pirrar dei barføtte føter
Eg seglar på fjorden til Palma la Paz
til Flekke og søtlege møter

Eg kysser i varsemd eit solstrålekinn
ja stjerner eg vitterleg sansar
I hugnad for fjorden eg draumane finn 
som lamma eg hoppar og dansar

Mi lukke er våren eg kjenner av lyst
i takksemd til landet av velde
Når songfuglar kvitrar i morgonen tyst
eg livskrefter finn i mi kjelde

Tekst og foto
G.Skaar

Himmelsk Blues


Eg er i grunnen blid og ty
og plystrar songar høgt i sky
Eg vandrar rundt på livets veg
og lyset brenn i kvart eit steg

Eg såg ei jente her ein dag
eit syn av sæle kvad eit slag
Eg kjende det som søt musikk
då auga traff eit salig blikk

Ein munn av roser bivra lett
eg fall i stavar rett og slett
Då lyster i mi sjel tok form
av jenter smekre seng og orm

Eg lukka auga godt ei stund
eg dorma visst so av ein blund
Då vinden kjæla ømt mitt kinn
so hender skolv av lengten min

I sjuand` himmel var eg no
av freisting svolt og heta blod
 Og knapt eg kjende att min sti
 av brannar i mi eiga li

Av minner stig det englar lys
dei varmar tankar når eg frys
Ja ingen gir meg slik ein rus
som dagar frå ein himmelsk blues

Tekst og foto 
G.Skaar


I all æve


No skodar eg syner so tindrande flott
som kveldsola stille meg sender
Mot havet ligg draumar av skinande slott
dei gløder mot heimlege strender

Eg kjenner på lukke frå himmel og nut
dei varmar og lindrar meg nære
No minnest eg gleda eg hadde som gut
då eldhugar levde so kjære

Sjå solbrune jenter med lystige smil
i hildring dei svingar og dansar
Til songar av kjærleik frå tusande mil
eg visseleg høyrer og sansar

Dei mjukaste former renn tankane fri
vi smeltar til eitt her i kvelden
Og natta mi lyser den næraste sti 
eg ottast ei pinsler og elden

Ja hit vil eg koma når livsdagen renn
når jordiske sansar tek ende
Sjå himmelske salar som strålar og brenn
i takksemd til åra han sende

Tekst og foto
G.Skaar

Brusande blod


I stilla mot kveld
skin lukke av is
Eg draumane held 
i fjellvindens bris

Eg speglar mitt liv
i lyset av gull
I gleda eg sviv
og trallar ein sull

Ja kveldstunda god
gjer tankane klår
I brusande blod 
eg trallar mot vår

I vårkvelden nær
der kjærleiken gror
Då er de meg kjær
du syster og bror

Tekst og foto 
G.Skaar

Raude roser


Stille varleg vaknar dagen
Roser raude på ditt kinn
Stjerner helsar sting i magen
Himmel-lògen tonar inn

Sola strekkjer nye hender
Livet glødar glade smil
Natta veiknar vinkar frender
Nye gneistar sluker tvil

Vassblank tindrar morgon dråpen
Lufta angar søt som vin
 Bygda kallar barn til dåpen
Stjernehimlen atter din

Tekst og foto 
G.Skaar

Gamal magi


Eg kjenner ei gamale skrukkute ei
Ho sprikjer med hender og tær
Ho står der og skodar mot himmelens lei
når årstider vaknar og fær

Eg klemmer mitt øyre mot rynkute kinn
og lyer til draumar i tid
So vidsynte kvinne eg aldri meir finn
ho løyser meg endelaust fri

Ja romma er mange i karrige kår
eit eventyr strøymer av stad
Om dagen i morgon eg aldri ei får
so strålar ei kjerring so glad

Tekst og foto 
G.Skaar


Farvel


Frå sanslege draumar eg kysser ditt kinn
Du søvnig meg kjæler du kjærasten min
Mi vandring er omme og dagen er nær
Eg elska deg jente du var meg så kjær

Eg vinkar frå stranda i vårsola klår
Åleine ligg møtet med målsnora vår
Eit fotspor i sanden er alt som er att
når draget frå floa tek dagen mot natt

Tekst og foto 
G.Skaar



Vårjenta



Eg kysser deg kjæraste spegelen min
eg klemmer deg dyraste skatt
I tidlause stunder du stadig meg finn
du lyser kvar evige natt

Du skjenker meg glede frå tindrande skål
frå himmel og dalar i blått
Og vinden syng songar mot endeleg mål
av kjærleik når dagar har gått

Eit hjarte av stein som fann bu i mi lyst
fann draumen av eskovens eld
Eg aldri skal høyre min spegel er tyst
når livsstraumen stundar mot kveld

Ei vårjente seglar so trufast i tid
eg kjenner eit andelaust band
Når prosten har tala ved gravrøysa mi
eg henne skal halde i hand

Tekst og foto 
G.Skaar

Velkomen


Velkomen til alle som byr meg ei hand
Auger so kjære og trygge
Med blomar i håret og silke som band
Her skal vi venskapet bygge

Freden skal spire frå bergsvae stup
Frå stiar so bratte og smale
Klåre vert fargar frå dalar so djup
Solskin frå vinter og dvale

Tekst og foto 
G.Skaar

Snøblomen


Du vakraste ven
mitt blendande land
Heldig var eg som fekk deg
Fald ut ditt hår
di kjærlege hand
Nærleik du gir på min veg

Tekst og foto
 G.Skaar

Mot natt


Flammen i vest
Glødar i fest
Seglar i land
Kjærleg i hand

Vester i veg
Ferda og eg
Leggja meg ned
Kvila i fred

Lyset renn ut
Skuggar frå nut
Finna mi ro
Saman vi to

Tekst og foto 
G.Skaar